近年長駐大陸發展嘅「啫神」徐錦江,佢拍戲重質不重量,反而投放大量時間搞藝術,師承已故嶺南畫派國畫大師關山月嘅佢,早年已轉營當畫家同雕塑家,徐錦江嘅藝術作品有價有市。日前《蘋果》就喺旺角捕獲到佢同老婆殷祝平、囝囝徐菲濕平大出血!

徐錦江幾年前喺安徽蚌埠市龍子湖旁邊籌備藝術園,據知藝術園投資額高達60億人民幣,園中有錦江藝術中心、螞蟻咖啡館及錦江藝術酒店三個項目,徐錦江個人總投資約5千萬人民幣,將於今年中開幕。正當藝術園籌備得如火如荼之際

徐錦江老婆殷祝平(微博圖片)

徐錦江日前一家三口返港探親。

徐錦江日前就同老婆殷祝平偷得浮生半閒,帶埋囝囝徐菲返港探親,返到嚟呢個購物天堂,梗係要去濕平。佢哋呢個三口之家,除咗幸福滿瀉,最特別係全家都剷咗平頭裝。

想當年徐錦江因為拍古裝扮大俠要剃光頭,徐太以行動支持,結果囝囝自細也係光頭仔,至今不變。返到香港,徐錦江一家三口就選擇咗住喺旺角,佢哋趁空檔去咗旺角新世紀廣場行街

一家三口去咗旺角血併。

徐太雖然生得細粒,但有高大老公徐錦江同囝囝傍實,份外突出,18歲嘅囝囝徐菲已身高6呎,媽咪撓住小鮮肉囝囝臂彎,感覺好溫馨。農曆新年將至,好多品牌都大減價,徐錦江佢哋就入咗一間大型連鎖店,一家三口就分頭睇心頭好,最後囝囝大有收穫,又買新外套,又買新波鞋,媽咪就當然負責畀錢埋單啦!

兩父子有商有量。

擁有六尺身高嘅徐菲,成個模特兒。

徐錦江仲幫老婆襯衫。

正當佢哋準備步出舖頭後,即有影迷上前拉住徐錦江夫婦合照留念,跟住佢哋就轉戰下一層去買化妝品,見到徐太對唇膏情有獨鍾,喺貨架前好細心咁揀顏色,徐錦江就好細心咁等候,非常體貼

徐錦江同囝囝感情要好。(微博圖片)

事後《蘋果》致電徐太,佢話:「帶Figo(徐菲)嚟香港玩幾日,佢鍾意港式飲茶,嗰日我哋啱啱飲完茶,就行吓商場。」有指徐菲備受電影公司睇中力邀拍戲,徐太話:「暑假時有畀佢拍過,佢好有興趣,但我哋o依家主要想佢讀好書先。」天氣轉冷,問到徐太可考慮留番長頭髮,佢話:「習慣咗短髮,好方便打理,我哋一家都同一個髮型,佢哋父子都係我嚟剪,我就自己剪,節省咗唔少理髮錢,又用少啲洗頭水,好環保。」

(蘋果日報)