黎小田(Michael)喺嚟緊農曆年初二同初三(17及18日)假紅館舉行《小田金曲50年》演唱會,今日佢同表演嘉賓薛家燕、陳曉東及湯寶如喺新蒲崗綵排。家燕姐唱Michael作俾梅艷芳嘅《心肝寶貝》,Michael喺側邊聽得好入神好冧咁款,家燕姐唱唱吓,Michael仲走埋去鍚咗家燕姐面珠一啖,家燕姐唱完之後,Michael仲好冧咁話:「冧晒!」

黎小田今日搵嚟演唱會嘉賓綵排

家燕姐話對任何人都會唱出感情!「我同小田合作咗幾十年,佢呢個作品演唱會,我一定俾心機練好啲歌詞,我成個心都俾咗佢啦。」講到被Michael錫錫,家燕姐話:「冇人喺度佢錫多幾啖呀。」

家燕姐唱歌時,被黎小田錫咗啖

Michael話好開心有今次演唱會,自己作曲嘅作品有700首,所以揀歌方面都好頭痛,佢話:「有啲歌手都唔喺度,諗邊個唱番啲歌真係有啲困難。」講到新年開演唱會,好多觀眾都會俾利是,Michael話:「我唔知呀,因為我唔會行台,我要彈嘢。」又話自己會俾演出嘉賓好友大利是。Michael話佢好友成龍可能都會出現,但對方冇講實嚟唔嚟。至於陳曉東太太王妤嫻帶埋兩個女朵朵同多多今日都有到場探班,阿東話:「2月10號我喺澳門有場演唱會,自己今日都要排,兩個女都要排練。」

陳曉東太太同兩名囡囡都有嚟

問到佢兩個囡囡係咪都會上台演出?阿東話:「試吓啦。」咁兩位陳小姐會唔會唱爸爸啲歌?阿東話:「唱兒歌好啲,近排自己綵排都比較密集,聽日都要繼續練舞。」阿東話會喺Michael演唱會唱張國榮嘅《儂本多情》、《我願意》及同湯寶如合唱,而農曆年會同太太及囡囡喺香港過,諗住同佢哋去搭吓巴士同去海洋公園,又計劃帶囡囡去台灣探婆婆。阿東話兩個女都好鍾意香港,問會唔會同囡囡喺香港長住?阿東話:「咁我要搞好多嘢㗎喎,總之暫時喺內地住,紿終小朋友學校喺內地,o依家乜都會以小朋友行先。」

湯寶如

(蘋果日報)