「86歲開騷呢,老實講我都好有信心!」即將踏入86高齡嘅「修哥」胡楓,將於2月10及11日假紅館舉行《86破晒紀錄》演唱會,老而彌堅嘅修哥滿臉自信話:「我平時多做運動,夠健康,身體固然之係好,做演唱會應該問題唔大嘅,問題比較大啲呢就係要跳舞,唔知道自己跳成點,夠唔夠氣呀!」

由粵語片年代入行,同蕭芳芳拍過多部歌舞片,當年被封為「舞王修」,今日修哥笑騎騎話:「年紀大咗,有時記性有啲問題,唔緊要嘅,盡量勤力啲,舞王唔舞王就唔係問題,最緊要做得開心。」縱橫娛樂圈64年嘅修哥,最開心同最唔開心都因為一個人:「我最開心得到我太太,最開心得到我嘅事業,最開心得到我嘅家庭,最開心得到我嘅契仔契女,最開心識到一班好好嘅朋友,最唔開心最痛苦係唔見咗我太太!」

去年10月愛妻胡呂詠荷因病離世,失去老伴令修哥承受一生最痛,結婚59年鶼鰈情深:「最辛苦後生嘅時候,個個都搵我拍戲,一日兩三組閒閒哋,搞到自己唔夠瞓,直情冇家庭生活,錯過咗同仔女一齊嘅時刻,有時自己都覺得好內疚!」修哥給天上嘅太太掌聲:「真係好!從來未曾哦過我,我太太好諒解我㗎,知道我工作係日以繼夜,所以佢唔識講哦文,唔識哦哦哦,仲好好服侍㖭,哈哈哈,所以呢…」修哥再三拍手,笑到瞇瞇眼:「真係回味。」係咪好掛住太太?修哥坦言:「當然啦,經常有啲思念。」

究竟修哥拍過幾次拖,太太係咪初戀呢?風趣嘅修風話:「講拍拖就真係好多次,嗱!第一次同太太拍拖,第二次同芳艷芬,第三次同白雪仙,跟住羅艷卿、鄧碧雲、林鳳、嘉玲、江雪、吳君麗,全部拍過晒,你唔好睇小我呀,我係大情人嚟㗎,哈哈。」老婆有冇呷醋?修哥再讚太太:「冇,從來冇講半句。」結婚咁多年都好恩愛?修哥:「係,我覺得自己好恩愛㗎。」

以前有冇唱情歌畀太太聽?修哥笑笑話:「對住佢唱幾句咁啦,邊首呢,又係藏在我心裏嘅秘密,學友(契仔張學友)會知嘅,哈哈哈。」開騷時會否喺觀眾席留座位給太太?修哥含蓄表示:「睇吓點。」此外,修哥入行拍首部電影《男人心》已一炮而紅,係咪咁多年都冇受過氣呢?修哥表示:「新人一定會受吓氣,畀人教訓吓:『做好啲啦』,畀蔣偉光師傅話吓囉,師傅話到OK嘅,蔣偉光係好賣座嘅導演,啲人叫佢財神導演,我第一套戲係佢導演。」

究竟娛樂圈畀到乜嘢滿足感,令修哥咁多年都唔退休呢?修哥笑笑:「呢個係我演藝工作嚟,所以我唔會放棄嘅,我有嘢做就好開心,樂此不疲。屋企人叫我唔好咁操勞,老實講,人在江湖身不由己,又拍劇又演唱會都好辛苦,不過自己開心,將辛苦全部蓋過晒。」訪問當日,修哥通宵拍劇到朝早6點才收工,瞓了幾粒鐘就接受連串專訪,好友羅蘭同契女方國珊全程陪伴照顧。

 

 

場地:狀元樓@iSQUARE

 

 

胡楓:「86歲開騷呢,老實講我都好有信心!」

修哥:「最唔開心最痛苦係唔見咗我太太。」

即將踏入86高齡嘅「修哥」胡楓,將於2月10及11日假紅館舉行《86破晒紀錄》演唱會

老而彌堅嘅修哥滿臉自信話:「我平時多做運動,夠健康。」

縱橫娛樂圈64年嘅修哥話最開心得到我嘅契仔契女,最開心得到我太太。

 

 

 

(Apple Daily)