星級司儀鄭裕玲(嘟嘟)最近又再衝出香港去Shopping喇!今次佢會帶住農夫、蕭正楠、黃翠如、馬國明去日本、丹麥、意大利等地拍旅遊節目《Do姐再Shopping》,唔使講,齋聽陣容都知有驚喜!昨日節目終於播出第一集日本篇,網上即惹嚟熱議,唔少人都大讚嘟嘟拍住農夫依然好有火花,仲話期待之後嘅行程添!

 

今朝,嘟嘟就喺Instagram分享粉絲上載嘅一條短片,同大家率先預告將有驚喜。原來佢去咗韓國追星,嗰位偶像仲要係拍過《三流人生》嘅朴敘俊添!嘟嘟上載同Oppa嘅合照,仲冧爆留言:「#do姐再shopping 多謝男朋友的出現 #國民男友 #朴敘俊 #parkseojoon」相中嘟嘟同朴敘俊坐低面對面交談,而其中一張相,見到60歲嘅嘟嘟攬住Oppa唔放手,面上盡是含羞答答嘅少女情懷!唔少網友見到後都紛紛嗌羨慕,仲話嘟嘟想見嘅人一定會見到喎!

(東方日報)