「四洲太子女」戴凱欣同上海姑爺樊林爽喺君悅酒店補搞結婚酒會,由於四洲集團主席戴德豐身兼全國政協常委、香港太平紳士等尊貴銜頭,又曾獲香港特區政府頒發金紫荊星章、銀紫荊星章,幾乎成個香港政圈人物都現身到賀,仲有高官、名人、藝人濟濟一堂,造就咗兩pair過氣情人同場聚首,包括曾傳緋聞嘅何超蓮同霍啟山、過氣夫婦呂良偉同鄺美雲。

賭王千金何超蓮狠撇台灣歌手吳克群後,曾經同霍震霆公子霍啟山傳緋聞,有傳霍啟山狂追超蓮,兩人被影到蜜遊台灣食牛肉麵,可惜最終未獲超蓮賜予男友名份;而鄺美雲係呂良偉嘅第二任老婆,兩人喺96年結婚,但婚姻僅維持一年半即閃離,現呂良偉跟第三任老婆楊小娟育有一子,鄺美雲至今仍然係單身貴族。

鄺美雲接受訪問表示:「同新娘一家都好熟,恭喜一對新人百年好合早生貴子。自己送人情。」單拖出席嘅呂良偉話老婆喺上海開會,問到有冇夫妻相處之道同一對新人分享?阿呂笑笑話:「老婆永遠是對的。祝佢哋新婚快樂,長長久久,永結同心。」

新娘想明年生B,問到有冇生仔秘笈提供?阿呂表示:「好吖,越快越好,要努力唔好嬉戲,認真啲。」有記者問食乜易懷孕呢?阿呂笑說:「我又唔係中醫。」而薛家燕着黃色外套似龍胞登基,十分隆重,家燕姐話:「同戴生戴太認識咗3、40年,千金結婚好開心,特登嚟飲,阿仔出年都娶老婆,我要嚟取經,仲好開心見到阿呂,因為大女之前喺上海撞到呂哥,仲諗住約佢食飯。」

(蘋果日報)