縱使樓價高到一個地步,係你節衣縮食儲極首期,都好似同大市距離好遙遠。但對於銀彈充足嘅藝人,當然又另作別話。

  

近年以夫妻檔喺大陸演出真人騷《一路上有你》嘅張智霖(Chilam)同袁詠儀,早排四處睇樓,包括港島傳統豪宅區淺水灣,當時一度傳出Chilam斥逾6,500萬,購入淺水灣道3號一個實用面積逾1,600方呎單位,不過,Chilam當時就話樓價太高,要等個市回落一啲先入市。

事隔4年,樓價繼續破頂,Chilam兩公婆近日終於唔再等重槌出擊,以9,180萬購入大坑大寶閣一個高層A室實用面積達2,465方呎嘅單位,同Sammi鄭秀文做鄰居。

而登記買家正係張智霖(CHEUNG CHI LAM JULIAN),但就未見老婆靚靚個名。原業主姓馮,91年斥690萬元購入,是次轉售賺逾8,500萬元。

對於斥近億買豪宅,今日Chilam接受訪問時,就坦言買樓係有住屋需要。佢話:「係真係需要有間屋住,至於投資各方面,就冇乜嘢回應啦。不過最重要一點,係我入市,唔代表我睇好個市,所以千祈唔好以為我入市,個市就好好,因為我唔識呢啲嘢㗎。」

(蘋果日報)