宣萱已經唔係無綫人,但佢依家成日喺無綫出現,之前有《不懂撒嬌的女人》,依家又有就快大結局嘅《使徒行者2》,深宵時份仲有《壹號皇庭3》。

原來,當年無綫五大花旦,包括張可頤、陳慧珊、郭可盈、佘詩曼同宣萱,宣萱係最後一個離巢。離巢原因,係不滿高層一句:「冇得加薪,你都唔旨在啦!」感覺不受尊重,於是下堂求去,樓都賣埋,費事供。

至於點解又返無綫,之前宣萱於不同訪問裡面都講過。咁,不如講下第二啲,例如張衞健。上世紀九十年代,張衞健同宣萱曾經驚天動地愛戀過,嗰陣張衞健仲形容宣萱係一個「令人流鼻血」的女人。GFable。後來兩人分手,發生一件好離奇嘅新聞:有周刊報道話,宣萱、張衞健、羅敏莊及方中信四人「關係複雜」,仲話宣萱唔會抹煞同方中信拍拖嘅可能性。

宣萱事後嬲爆話被屈,方中信話同宣萱只係兄弟,張衞健話啱啱分手唔可以立即投入新戀情;羅敏莊就話,同張衞健嘅關係只係「開解失戀嘅朋友」。當時宣萱怒爆:「宣萱四角戀喎……話我同方中信上過牀都得嘅啦!我就嚟要封嘴㗎喇!」

呢單厘頭新聞,發生於1995年。但宣萱話,佢最hurt,係發現初戀情人一腳搭兩船。當時佢只得18歲。今次今日再講番已為人夫嘅張衞健,宣萱接受《舊日的足跡》主持車淑梅訪問時話:「佢係一個好勤力嘅演員,會通宵唔瞓睇劇本。我欣賞佢非常幽默,若果人太正經,唔鍾意笑,點相處一世?」

重提二人分手因由,宣萱話已經唔記得邊個提出分手,但佢諗番張衛健嘅思想較為傳統,接受唔到女方事業比自己好:「我向佢解釋,每一個人(事業)都會跌落嚟,就算紅廿年,都未必紅足卅年,一定有起跌。無奈在男人角度,事業係非常重要。」

宣萱話依家仍有留意張衛健嘅消息,為佢成家立室而感到高興。宣萱指自己仍努力尋找另一半,但並不心急,「因為自己都過咗想生兒育女嘅年紀。」

(蘋果日報)

留言