兩個都係「天秤男」,一個生於10月1日,一個係生於10月21日。年齡相差20年,但他們的交情,超過17年。今日,兩個天秤男更走在一起,為21號生日那位預祝牛一。

講緊嘅係黃毓民,同古天樂。古天樂嚟緊21號生日,今晚毓民就於FB貼圖,與古天樂搭膊頭合照。毓民寫道:「聚舊(預祝古仔牛一)」網民已經尖叫啦,狂嗌「男神」、「原來教主同古先生係friends」、「教主型過古天樂呀」、「有冇唱《男朋友》呀?」、「敎主嘅人脈真係令人葡萄」…係真係令人葡萄嘅……

古天樂同黃毓民其實真係識咗起碼廿年,兩人仲合作過拍電影,03年《戀上你的床》,古仔飾演高志強,黃毓民飾演雜誌總編輯;兩人06年又合作拍過《寶貝計劃》——係呀,成龍嗰套。睇番資料,95年兩人曾同場出席首映,到00年又一齊出席一間眼鏡店剪綵,當時同場仲有楊恭如。


 

係喇,根據歷史考證,鄭伊健00年12月宣傳電影《Badboy特攻》時,踢爆古仔同楊恭如拍拖,而剪綵當日,古仔同楊恭如不避嫌一同到場,不過古仔就寧願同黃毓民交談,與楊恭如保持距離。睇番啲相,黃毓民同古仔秤不離陀,兩人更似一對。其實唔止0架,當年……即係97年,黃毓民曾收張玉珊為契女,而咁啱,張玉珊喺96年同古天樂合拍首部電影《男燒衣》期間,曾傳撻著。但後來隨著張玉珊與向華勝戀情曝光,傳聞不了了之。

(蘋果日報)

留言