原名黃煥嬋的麗莎,來自新加坡、70年代的廣東歌后,下月即將在香港舉行首次個人演唱會。麗莎說:「第一次四面台,表演嘅方式會有啲唔同,舞步都要改啲。」

麗莎9歲便穿梭各種商演,1972年憑《相思淚》首次來港演出,十年後退出歌壇時,她從未認為自己可以唱到老:「我嗰時覺得要搵份穩定嘅工,要結婚生仔,於是開咗間錄音帶工廠。我咩都親力親為,生咗仔都帶埋返工廠,真係好大壓力,仲要煮飯、打理屋企,最後生意失敗。」後來突然昏迷十一年,醒來時,囝囝已經十六歲,媽媽亦過身。

「昏睡同昏迷係唔同,我有感覺,但起唔到身,我同自己講我唔要死,我唔想白白咁死!」麗莎說。麗莎坦言當年壓力很大,但昏睡卻是因醫生拒絕開藥而引發:「我一直有食藥,但佢(醫生)驚我過量,所以唔畀。我知道自己昏睡之後,我喺個腦海講『我!唔!要!死!』我唔放棄,為咗個家,我個仔仲咁細,我唔想白白咁死。當時喺醫院scan過晒所有嘢都冇事,點解我會起唔到身?十一年?我唔知道,病就係病,日日都係咁過,係,我完全感受到,就係唔知點解起唔到身,唔知道點計日子。」

醒來以後,麗莎重新向最愛的道路出發:「我真係好鍾意唱歌,o依家仲有得唱,老嘢都仲得喎。不過起身嗰陣係唔敢唱,因為把聲好低,真係好辛苦,但係唔唱歌我冇錢呀。當時媽媽過咗身,個仔又得16歲,於是凌霄(新加坡歌手)鼓勵我,仲介紹唱片公司老闆畀我,老闆叫我去卡拉OK試下,話如果我唱就$200一次,我即刻問下朋友,因為我驚人哋呃我呀。我心諗,以前我紅得不得了喎,我朋友都$400一次啦,點解我仲少錢過佢嘅?」

重返樂壇,麗莎謂兒子不會擔心,她說:「佢叫我唔使湊孫,玩下就得,佢成日叫我想做咩就做咩,因為我瞓咗十年。我除咗同孫女玩,我仲玩Facebook,識咗個喺Facebook自己寫歌、唱歌嘅網友,我仲邀請咗佢幫我寫歌,希望嚟做演唱會嗰陣,可以同佢見面。」難得從睡夢醒來,麗莎直言讓她變得更樂天:「人生冇得控制,不過我唔要死,o依家我好開心,有得唱歌就好開心。」

(蘋果日報)

留言