夏蕙姨一向人老心不老,係個非常玩得嘅老友記!夏蕙姨尋晚喺尖沙嘴出席「愉美人競選大賽」活動,原來佢喺2010都參加過,當年仲攞埋冠軍,佢話:「當年朋友叫我選,年紀大至可以選,但我都70幾歲人,真係唔好喇,咁老,不過朋友幫我畀咗$1500報名費,話如果我入選就還番$1500畀佢。」最後夏蕙姨入咗選,佢覺得既然入選,就應該畀心機去做,結果佢拎到才藝、跳舞、唱歌、服裝方面4項冠軍。

夏蕙姨好自信咁話:「一個人嘅成功唔係靠運氣,而係要經過努力。我初時都唔想去選,17歲選過工展小姐,相隔幾十年再選,自己都怕。」而未來嘅目標,當然就唔係選美啦,夏蕙姨好有心,想搞老人院,選址喺大埔,仲包生養死葬,佢話嚟緊自己嘅87歲生日,11月30日當晚,會喺九龍灣大排筵席80圍,搞籌款晚宴,希望籌到幾千萬,建老人院。

(蘋果日報)

留言