陳奕迅(Eason)可算係圈中好爸爸,佢同老婆徐濠縈自06年結婚以來,不時行孖咇,獨生女康堤下個月都13歲,時間過得好快。

有「吹神」之稱嘅Eason日前上ViuTV為該台新節目《吹臣》做嘉賓,鄒凱光、陶傑、卓韻芝等主持人向Eason大逼供,問出Eason原來年紀小小,得嗰12歲人仔已經識得法式濕吻!

Eason承認自己喺12歲已經有接吻經驗,被問到係蜻蜓點水式,定係法式濕吻?Eason答咗一句「係呀」之後,就解說自己對接吻嘅理解:「我成日以為呢,接吻係個男仔要吸個女仔啲氣。」佢仲話自己不時有練習,就係吸隻自己手個虎口位。坐喺旁邊嘅陶傑話啲英國人好鍾意中國人,但Eason就話未遇過有人明目張膽話要同自己有進一步嘅關係,佢話:「對方話You are so cute,永遠都係cute,但係我就get唔到,因為未入到佢嘅文化,原來佢話cute就即係可能佢鍾意你,但如果你同我講handsome,我就真係開心好多。」仲笑言會即刻落疊,Eason更自嘲:「我點會係可愛先得㗎?」主持笑佢可能流失好多機會,Eason笑言:「其實都應該係……」

喺節目中,Eason透露初戀女友係直布羅陀人,仲用最old school嘅方法——傳紙仔,仲講到佢答應個女仔之後,對方開心到喺一個大家都耷低頭做功課嘅環境中彈起身「Yeah!」咗一下,搞到Eason勁尷尬!

 

(蘋果日報)

留言