歌神張學友的《A Class Tour學友經典世界巡迴演唱會》去年底在北京揭幕,現已走遍內地超過40多個城巿,還有香港、澳門、台北及新加坡等。張學友的世界巡迴演唱會一票難求,之前在紅館的23場騷,門票火速售罄,不過上次未能入場睇騷的歌迷不用灰心,皆因學友話會再在香港開騷!

 


剛在成都連唱兩場的學友,在9個月內完成了103場巡唱。他對上一次2010至2012年舉行的世界巡唱,在18個月內做了146場演唱會,相隔5年,學友將會再破自己保持的場數紀錄!56歲的學友被問到累不累,他笑說:「OK喎!(做咗103場騷?)係呀,做得幾開心,好似有啲進步!(邊方面?)我覺得喺做騷、唱歌各方面,都好正!(9個月內做咗百場騷,真係好快?)快呀,快過上次!(會唔會破到你上次18個月唱146場紀錄?)應該會破。」

 


學友今年56歲,體力依然弗到爆,他笑說:「其實都估唔到,開頭我都驚驚哋,但好似冇乜嘢咁(指做騷),幾開心!(你撈晒,人哋唔使撈!)車,唔關事,各做各啫,唔關場數問題。」

問到他會否再在港開騷?他指:「會呀,返嚟錄(影),因為上次我未錄(影),不過未知幾時,未訂場。」下一站學友將到貴州,緊接是到家鄉天津開唱。據知學友目前的巡唱暫時排到明年3月,除了內地多個城巿,還有星馬、泰國、美加、歐洲,因為有些地方反應熱烈,徇眾要求下將會加場演出,包括台北、新加坡、北京、深圳等地。


(on.cc)

留言