近排憑《同盟》一劇走紅嘅歐瑞偉,日前同「鷲哥」吳岱融上咗郵輪登台唱歌,原來佢哋兩個合作拍劇多年,份屬好兄弟,但登台做騷今次都係第一次,當「鷲哥」遇上「易先生」,台下觀眾反應當然好熱烈,其中吳岱融同歐瑞偉合唱咗鄭少秋嘅《倚天屠龍記》,易先生原來唱功都唔錯。

佢哋兩兄弟今次上郵輪做騷,兩邊屋企人都有出嚟撐場,吳岱融同鍾淑慧個仔雖然喺新加坡當兵嚟唔到,但鍾淑慧媽咪、細妹、妹夫等等都有上埋遊郵輪玩,至於歐瑞偉太太同一對仔女亦有陪爹哋上船。首次見歐瑞偉對仔女,原來都係靚仔靚女,遺傳咗父母嘅靚靚基因。

吳岱融今日接受傳媒訪問時話:「我同瑞偉真係好多年朋友,當年大家都係古裝人,拍過好多劇,今次第一次一齊登台唱歌,真係好開心好好玩。」

鍾淑慧今日接受訪問時就話:「之前郵輪搵岱融做,叫佢搵個拍檔做嘉賓,所以搵咗瑞偉,點知咁啱呢期瑞偉個易先生又咁紅,『鷲哥』遇上『易先生』,現場觀眾反應好到不得了,佢哋兩個諗緊組成一個組合唱歌㖭。」

(蘋果日報)