朱咪咪今年2月喺紅館舉行《利利是是演唱會2017》時,就已經預告咗大仔馬健庭會喺今年年尾結婚。

當時咪咪姐仲話10月先喺新加坡註冊,11月先分別返大馬同香港擺酒。但原來噚晚健庭同女友Jeanette已經噚晚結咗婚喇!真係恭喜晒咪咪姐!

今朝凌晨3點幾,咪咪姐嘅官方微博上載咗幾張大仔健庭嘅結婚相。

「馬生&咪咪姐榮升新老爺、新奶奶之喜,看着他囝囝長大,現在成家立室了,真替他們高興,恭祝一對新人百年好合永結同心。三年抱兩,滿堂吉慶席間還遇到好多老友添,這個不一様的新奶奶,職業病無計喇,好攪,自己做埋司儀添!」

一向圈中人緣甚好嘅咪咪姐,到賀嘅圈中人當然唔少啦,包括姜皓文、譚炳文、黃一山、黃俊棠、李家仁醫生、尹揚明、方伊琪、喬寶寶等等,真係好熱鬧!

(Apple Daily)