從影近四十年嘅惠英紅,早係1982年已經憑動作片《長輩》摘下第一屆金像獎影后,從此奠定武打演員路線,拍下無數動作片,後來再憑《心魔》及《幸運是我》兩度奪得影后寶座。事實上紅姐近年已經好少亮相動作片,直到由《心魔》導演何宇恒主理嘅《Mrs K》,以56歲高齡由頭打到尾,並宣告自此告別動作片。

現年56歲嘅惠英紅曾三奪影后,早排佢就接拍何宇恒執導嘅動作片《Mrs K》,不過佢宣佈從此告別動作片,日前佢喺銅鑼灣接受訪問,講到演出接拍《Mrs K》主因是出自報恩:「今次已經第三次同何導合作,劇本佢喺五年前我51歲嘅時候就已經話開,結果等到我56歲先開,如果再遲多一年我都拍唔到啦。」

紅姐坦言絕對屬年紀問題:「因為知道自己無論點keep,身體機能都係退化,開始信心不足,而且喺拍攝過程入面又受咗傷,胸骨都裂埋,所以就知道真係時候要停,否則搵埋啲錢都唔夠睇醫生。」

講就咁講,但紅姐依然對何導充滿感激,尤其是因為演出《心魔》,令從情緒病困擾嘅佢,再度復出幕前,並成功摘下影后寶座:「全因為佢,否則我唔會行得番咁快,佢未出現嗰兩年,過程係幾辛苦,同時亦帶畀我好多捷徑,去行返嚟今時今日呢度,所以當佢搵我傾嘅時候,我係一口應承。」

戲中紅姐由頭帶到尾,既要拳拳到肉同任達華加埋大馬影帝Faizal Hussein過招,同戲中丈夫伍佰同囡囡嘅連場內心戲都佔相當大篇幅。紅姐覺得以《Mrs K》作為動作片收山作相當完滿:「要遇到一個劇本以自己為中心,我諗錯過咗未必遇得番,而且呢個(何導)係我嘅恩人,所以係一個好好嘅機會做收山作。」

回望數十年動作片生涯,紅姐感到完全無憾:「50幾歲高齡整個咁好嘅劇本畀我仲想點?唔係個個有呢啲機會,有啲轉咗戲路就不了了之,所以我覺得個天對我好好。」

公開宣佈停拍動作片原來有另一考慮,紅姐說:「我份人唔識得say No,講咗以後其他人唔使搵我啦,唔想再用自己身體嚟較飛,我最怕係臨老先嚟出問題就淒涼,其實依家身體都有唔少問題,同細佬妹去旅行行得耐都周身骨痛,呢啲全部都係以前嘅舊患。」

此外,本地著名藝術家又一山人幫紅姐拍咗一輯相集,喺即日起至16日於荔枝角D2 place商場舉行「惠英紅Moving On 57 x 57」展覽,本月18日至10月2日則移師尖沙嘴iSquare舉行。

(蘋果日報)