【十二年任務完成】 鄧梓峰同「巴斯光年星際歷險」講再見

好多人今日特地帶埋小朋友去同巴斯講再見,包括Celine美心妹妹楊鎧凝,原以為佢一定周身唔得閒啦,估唔到佢仲好似無事一樣,拖住小朋友四圍跑。望住佢哋嘅背影,忽然嗅到一陣洋蔥味…今日迪士尼都有舉行「道別」儀式,巴斯光年失散兄弟——十郎鄧梓峰當然都有出席,一齊擺出招牌pose,大家都話儍儍分不清唔知邊個先至係巴斯。

十郎同失散兄弟講再見,會唔會唔捨得?佢同傳媒講:「咁又冇乜所謂,我覺得同啲細路去樂園玩,所有記憶都在心中,可能o依家小朋友啲口味又會轉變,佢哋鍾意Marvel呢類英雄人物,所以樂園都要作出啲改變,與時並進,巴斯個人只係行遠啲,返咗去ToyStory Land,人物仲喺度,只係冇咗『巴斯光年星際歷險』呢個遊戲。」不過呢個遊戲次次都有好多人玩,十郎話:「有啲人鍾意玩個遊戲係鬥分數,好容易玩完一次唔收貨又排多一次,所以嗰個遊戲幾時都好迫人。

我自己都有成日玩,嗰陣我啲仔女仲細,一家六口分兩架車去玩。」十朗又話知道咗巴斯撤退,都有入去玩多次。話晒係歡送巴斯,十郎當然有一齊影相,佢仲話啲人唔係叫佢鄧梓峰:「佢哋嗌親我都唔係叫梓峰,係叫巴斯,我自己初初唔覺,不過聽大家講得多,都開始覺得有啲似。呢個係一個幾好嘅回憶,亦都好好玩,因為呢個卡通人物,我同唔同年紀嘅人有一個連結,好似啲小學生、中學生,佢哋都會諗起我似巴斯,同親我影相嘅人,都會話同巴斯影咗相。」

其實由月初宣佈巴斯撤退開始,好多人已經話唔捨得,除咗覺得「巴斯光年星際歷險」係迪士尼嘅共同回憶,仲話係樂園入面最好玩嘅遊戲設施,嚟緊呢個地方,就會改建成Marvel主題嘅射擊遊戲,配合番Ironman。樂園為咗紀念「巴斯光年星際歷險」,之前仲印咗本特刊,除咗有設施內嘅特寫,仲有巴斯嘅紙模型o添。

(蘋果日報)