【王書麒許秋怡結婚多年】指中咗伏幾十年﹗

嫁咗畀王書麒,許秋怡笑言自己。。。

王書麒、許秋怡、吳浣儀今日到荃灣奇妙電視錄影廠錄影節目《中伏》,許秋怡笑言自己中咗伏幾十年,嫁咗畀王書麒。節目講述一啲法律知識,佢哋兩公婆好慶幸條路都幾順,冇咩面對呢種問題,許秋怡表示以前歌手身份出道,身邊有經理人安排一切,呢十幾廿年喺大陸都有經理人。

香港未試過中伏,但大陸都有唔少遭遇,許秋怡話:「十幾廿年前啱啱返大陸發展試過收唔到酬勞,仲記得嗰個年代去山區地方,唔係大城市,中介人好奸,收咗老闆錢走佬,但自己個人都去到當地,都會照唱歌當做善事,發生過好多單。」王書麒就話自己現時睇合約好謹慎,唔明白就會搵律師幫手,唔同以前細嗰時:「嗰時睇電視台簽約直頭唔睇,其一自己睇唔明,只會睇到個錢同年份,因為當時有一顆做戲熱血會照簽。」浣儀姐喺節目會就會分享借錢嘅故事,佢話:「自己借咗畀朋友當幫咗人,自己弱點只要你話睇病我就會借,當你去追問過人哋一兩次冇還,我就會算數。」

(蘋果日報)