【拍《皆大歡喜》傳同薛家燕不和】 苑瓊丹:好多人背後做手腳

苑仔話:「時間人物我唔講啦,我從來都係會講件事但唔開名。我做得好唔開心,曾經係諗過退休,但我又覺得唔忿氣。。。

苑瓊丹(苑仔)係好戲之人,相信冇人會質疑,偏偏喺亞視拍劇,苑仔就曾經俾人話過唔識做戲,仲幾乎俾人炒魷執包袱。

事緣苑仔喺亞視初期,劇中做過唔少妃嬪角色,不過苑仔話自己本身唔係斯文人,當年嗰類角色其實唔適合佢做。苑仔表示:「佢哋覺得我唔識做戲,85年做埋《十兄弟》,就冇㗎啦,唔會再簽我,我個角色有撻疤,叫小菊,傻吓傻吓又花癡咁,呢部係亞洲電視比較收得嘅戲,又救番我,跟住公司掉份合約問我簽唔簽,簽就簽兩年,人工冇加,我咪再做吓添囉。咁樣開始做啲丑角,做吓做吓咪變咗丑角專業戶囉。」

演龜婆做醜女,苑仔覺得比較容易掌握,自己亦喜歡做呢類型戲,反而舒舒服服坐定定冇乜性格嘅秘書角色,係佢一生人最怕做。近日苑仔為內地拍攝一個網劇演變態母親,親手將女兒斬死分屍,苑仔形容過足戲癮:「做得我好開心、好過癮,直情好似出咗一身汗,嗰種舒服好難以言語形容。」除咗電影,苑仔喺電視方面都有唔少代表作,包括《封神榜》飾演嘅殷十娘,就有網民形容為苑仔顛峰之作。

不過,苑仔喺2009年開始,就向無綫請假返內地拍劇,直至13年正式約滿離開無綫。講到當年離開無綫原因,原來除咗佢本身想去內地發展之外,最主要原因係有人為咗爭嘢做而中傷佢。苑仔話:「點解我離開,其中一個原因係做得唔開心,當有競爭嘅候,大家就好鍾意爭,我係一個好憎爭嘢嘅人,我覺得搵你做你咪做囉,或者啱你做你咪做囉,開始發覺有人爭嘢做,喺背後做啲手腳,中傷你又好玩你又好,古靈精怪乜都出齊,我開始好討厭。」

03年苑仔同薛家燕拍《皆大歡喜》時曾傳不和,之後苑仔繼續拍唔少劇集,究竟係邊個喺背後中傷,苑仔一慨唔講:「時間人物我唔講啦,我從來都係會講件事但唔開名。我做得好唔開心,曾經係諗過退休,但我又覺得唔忿氣,當然唔忿氣唔係最主要原因,我有套戲做完之後,屋企人好想我攞獎,原來屋企人有睇我做戲,唔係當我做份職業,佢哋都有期望我做啲成績出嚟。咁我就諗,冇理由你班友仔做啲小動作,為咗我適應唔到呢個方式我就離開,冇理由㗎喎!我一路想返大陸發展,所以有機會我咪去囉。」

(蘋果日報)