喺91年參加《環球小姐》而入行嘅姚瑩瑩,由當年嘅青春小艾到今日嘅婦道人家,由姐仔邁向甘草,瑩瑩依然留喺大台默默耕耘。

6年前,39歲嘅姚瑩瑩,同拍拖8年嘅男友,生咗個重9.2磅嘅囝囝Evan。做咗人媽咪嘅瑩瑩,同男友keep住冇結婚,瑩瑩亦鮮有提及男友嘅身份,繼續將感情事密冚,不過身形同動靜就開始滲出陣陣師奶味。

周三(16日)下晝約6點,45歲嘅瑩瑩,踢拖現身沙田宜家傢私,同行嘅有外傭同6歲Evan,不過身邊仲有個年約40歲嘅中年男士,喺現場一直照顧住Evan,該男士身穿黑色Tee同牛仔褲,中等身形。

以外形嚟講,同瑩瑩頗匹配。現場所見,瑩瑩專注詢問職員有關衣櫃嘅尺吋,又不時用英文同外傭溝通,問對方睡房size夠唔夠擺。

至於同行嘅中年男士,就主動帶Evan到兒童遊戲區,耐心教他點樣玩。

期間,Evan大聲向媽咪表示:「媽咪,我急屎呀!」由於瑩瑩忙於同職員交涉緊,只「唔、唔」兩聲回應囝囝,該男士就醒目帶囝囝去廁所。

(蘋果日報)