【85歲李香琴貪靚搽指甲】黃夏蕙﹕佢仲認得我

 今年85歲嘅李香琴自12年退休後,多次在家中跌倒,又傳出現腦退化徵狀。日前老拍檔譚炳文出席活動,表示有11個月冇見琴姐,仲慨嘆﹕「唔知認唔認得人,其實搵佢都冇用啦!可能佢捱緊苦,都費事搵佢喇!」

今日黃夏蕙喺facebook貼咗琴姐近照,透露與炳哥女兒譚淑瑩及一名女友人去探琴姐,見琴姐頭髮已經白晒,但仲好貪靚,搽咗粉紅色指甲油,拎住一隻金雞擺設,夏蕙姨留言﹕「我同瑩瑩一齊去探香琴姐,佢身體好番好多啦,仲認得我添。」相信關心琴姐嘅朋友都可以放下心頭大石。據知黃夏蕙係一周前同譚炳文女兒瑩瑩一齊去探琴姐,因為瑩瑩經常同琴姐聯絡,佢一見就認出,至於夏蕙BB,琴姐就要諗咗一下。夏蕙姨今日接受電話訪問,佢話:「我講起舊事,琴姐雖然反應唔算強,但佢都答:『我知,我知』,琴姐狀況好好,好精神吓。」夏蕙姨今年訂咗好多金雞,但今年未探琴姐,特別留咗一隻送佢,佢哋逗留咗大約一小時就離開,因為琴姐都會攰,唔想阻佢休息。

(蘋果日報)