三哥苗僑偉同三嫂戚美珍愛囡苗彤(Phoebe)今日喺灣仔一間餐廳舉行迷你影展,埸內掛上近十幅作品,係佢近兩年喺香港、泰國同美加所影作品,主要影人像為主。今次係佢首次辦個人相展,未知何時再辦大型影展,暫時以全職攝影為工作,會拍攝婚紗相。平時鍾意周圍影人,但從未試過以家人為模特兒,當提議佢幫爸爸三哥影寫真?佢話:「佢就想啦。」

父母同弟弟非常支持,但三哥開緊工嚟唔到,媽咪就陪住三哥開工,而細佬苗俊身在加拿大,講到細佬日前不小心於IG公開咗譚曉風(Howard)容貌,Phoebe完全唔知情,佢話:「吓,Howard,我完全唔知。我哋同佢都識,可能佢同細佬都喺加拿大,所以見到面。」佢又講到自細父母無特別要求佢哋保護容貌,而佢同細佬都一向低調。

(蘋果日報)