劉倩怡,名字有啲生面口,但佢把聲一定有聽過。

 

劉倩怡係港台DJ出身,90年代加盟無綫,主持過《城市追擊》、《勁歌金曲》等節目,又拍過《香港人在廣州》同《鑑證實錄》等劇集,到2000年左右佢就離開咗無綫,投身基督教團體製作工作,搞過非牟利機構「想飛傳播」,近年佢重返港台,主持《恬淡情懷》。喺舊年開始喺尖沙嘴開設小店賣手工皂,到個多月前,再喺西貢開生活館賣雜貨。

劉倩怡更出名嘅,好可能係佢係有「完美奸人」之稱嘅「音樂情人」鄭子誠嘅太太。

日前劉倩怡喺自己位於西貢嘅小店接受《蘋果》專訪,被問到做「音樂情人」嘅另一半,係咪每日都好浪漫咁過?喺太太眼中,鄭子誠究竟係一個點嘅情人?對住老婆有冇陰謀、畀驚喜浪漫?劉倩怡話:「浪漫呢樣嘢好主觀,係咪candle light dinner?有樣我可以肯定,佢好重視節日,每次節日佢都會有預備啲嘢,禮物會買,另外就係卡,生日卡、結婚周年卡、情人節卡,一定有,佢一定係用心挑選,寫滿晒字。我本來唔重視節日,但因為佢,我重視節日多咗。」問到老公心思方面值幾多分?劉倩怡話:「如果10分滿分,佢中間位6分啦!總之每次佢都有卡,寫啲情深嘅說話。」劉倩怡話佢老公都試過有驚喜畀佢,但唔係好極端嗰種,佢話:「一年有咁多節日,如果次次咁諗都幾辛苦。」劉倩怡話多年前子誠喺內地拍嘢兼過生日,自己喺5月26日打畀對方祝佢生日快樂,點知原來記錯日子,老公係5月21日生日,好在咁多年嚟只係試過一次。

結婚14年,有冇諗過生小朋友?劉倩怡話:「我好鍾意小朋友,但結婚嗰陣年紀都相對大,佢最近都公開咗,佢結過婚,有仔㗎喇。嗰陣時我心態係既然佢都有,我又年紀大,如果因為生小朋友而出現啲乜嘢問題,無論小朋友或者我自己嘅健康,我又唔係好想,所以我就放低咗冇諗。」

不時孖孖住出席活動嘅劉倩怡同鄭子誠,經常俾人話係恩愛夫妻,但原來劉倩怡唔想俾人標榜做恩愛夫妻有幾恩愛。佢舉咗個例,話近日有團體邀請佢哋兩公婆一齊出席分享活動,喺活動印製嘅海報本來寫佢哋十分恩愛、但劉倩怡叫大會刪去,佢解釋話:「因為我唔想咁表面,就算我哋恩愛,對其他人嚟講又有乜意義呢?有人問我,佢(鄭子誠)把聲好好聽喎,你係咪每日都好冧?子誠其實無論乜嘢時候講嘢,把聲都係咁,但兩個人生活唔係靠把聲㗎嘛,唔係佢把聲靚我就生活得開心啲,我哋唔可以睇得咁表面。兩個人生活係非常人性,可能有啲細節嘅嘢大家都會唔高興、吵架,唔好恩愛就概括晒所有嘅嘢。」

劉倩怡補充稱:「另一樣大家經常一齊出席活動,其實我哋經常一齊出席公開活動又有乜重要性呢?我哋兩個都係比較靜嘅人,我哋唔係社交好活躍嘅人,如果有啲佢出席嘅活動,我有時間咪陪吓佢,好似佢《音樂情人》搞活動,如果我得嘅冇理由唔去,呢個唔係代表晒我哋一年365日婚姻生活就係嗰個moment裏邊嘅嘢,所以我從來唔會去評價人哋感情,因為呢個實在係太『人』嘅嘢。」

(蘋果日報)