YO! 家庭, YO! 藝人

【剖白被家暴原因】肥媽承認係自己搞禍首段婚姻

千呼萬喚,肥媽Maria Cordero再度現身《關你家事》。

點解咁講呢?因為早喺《關你家事》播預告片時,將肥媽喊苦喊忽、哭訴遭前夫家暴嘅慘事,同一集仲有林雅詩,又係講遭受家暴,點知得唔到同情不特止,坊間嘅反應竟然一面倒插爆!

呢一集拖拖拖,喺節目開播兩星期後,噚晚後終於都播。肥媽登場,就提到自己被家暴嘅經驗,佢話被前夫打,眼淚未見,但佢承認第一段婚姻係佢自己有份搞禍嘅。

肥媽提到:「我以前老公咪係囉!又打我又打細路仔,佢打我啲細路我欄住佢吖嘛!係我嘅錯嚟,我哋做女人屋企唔夠錢就做多兩份工,攞啲菜去賣,整啲豬腸呀粉,乜都自己搞掂,電費、仔女學費自己搞掂,奪去咗佢做父親嘅責任,咁啲細路哥咪睇佢唔起,佢又冇咗做丈夫嘅尊重(尊嚴)。」佢仲話賺到嘅錢,成份糧畀埋個老公(即其第一任丈夫)。

久而久之,肥媽暗地裏已經做埋「一家之主」嗰份,佢自己心底入面已經睇唔起個老公:「我以前唔知,原來我一早已經睇佢唔起。」啲仔女亦睇在眼內。再然後,其前夫因為覺得啲細路唔尊重自己,於是就出手打仔女,肥媽見狀幫手擋,於是同樣被打,惡性循環之下,種下屋企分裂嘅因。最後,肥媽啲仔女畀兩條路佢揀:一係揀老公,一係揀仔女,啲仔女仲話覺得跟住爸爸冇前途,結果肥媽揀仔女,同前夫離婚。肥媽仲提到離婚時,前夫喺律師面前話佢「係一個好霸道嘅老婆」,仲引伸出兩夫婦因為欠缺溝通,就容易有問題。

至於林雅詩,講起被家暴時,把聲有少少哽咽嘅,佢話婚後被老公(即前夫)要求唔好出去做嘢,佢真係有聽話相夫教子,但係老公放工返屋企時,可能會將工作上嘅唔開心等負面情緒帶返屋企,又可能會去騷擾到囝囝,林雅詩話老公會去搣個仔,搞到囝囝手臂瘀咗,囝囝變得驚咗爸爸,原本諗住忍,唔開心都行入廁所喊就婚,但最後係囝囝叫佢離婚。

由於今晚只係得半集有肥媽同林雅詩份,而單係講佢哋被家暴嘅background都已經去咗一半air time,所以想睇戲肉——即係肥媽大喊嗰啲,再等吓o添啦……

 

 

(蘋果日報)

 

發佈留言

發佈留言必須填寫的電子郵件地址不會公開。 必填欄位標示為 *

關閉