前輩歌手成名已久,唔少可能久唔久出嚟唱吓歌就算,近年都好少出碟,加上網上有咁多新事物,所以有年輕人唔識一啲十幾年前已經當紅嘅歌手,一啲都唔出奇!

好似呢日咁,Facebook專頁「空姐與男空姐」出咗post,話有位男乘客某日主動向服務員表示「今日唔影相、唔簽名。」服務員聽完之後覺得好奇怪,心諗點解有人無情情話自己唔簽名呢,但又認唔出對方究竟係乜水喎!

不過佢哋睇完乘客名單之後,先知道原來對方喺黃凱芹嚟!有個資深服務員仲話:「哦!原來係佢!難怪你哋唔識!」之旦係唔知點解,呢個專頁已經刪咗post。

其實黃凱芹於80年代叱吒一時,做過港台DJ,之後參加歌唱比賽出道,首張專輯《Moody》更達雙白金銷量,但去到94年就移民加拿大,02年曾經返過嚟香港,但兩年後又返加拿大。直到2014年,佢再簽唱片公司,開始出翻唱專輯,今年夏季亦有新專輯推出。

(SINA)