YO! 藝人

【結束12年婚姻】江欣燕母女爆喊

媽媽是世界上最好的,江欣燕日前與江媽媽到卡拉OK,除咗為媽媽送上《世上只有》及《真的愛妳》兩首歌,更感激媽咪畀咗一個靚樣,仲有好大人生空間佢。

欣欣4年前與前夫吳積遜結束12年婚姻,江媽媽於訪問中戥女兒難過:「我唔知佢當時咁唔開心,一定忍咗好耐先做決定。當時我哋(同江爸爸)喺英國,我話唔使擔心,你搬返嚟住,我哋會預備房間畀你。」

欣欣兩姐妹嘅愛情都唔順利,作為媽咪點陪女兒度過?江媽媽自責:「我唔係好叻、好識做媽咪嘅人!其實睇到佢哋開心,我就開心,最擔心佢哋有唔開心,我做媽媽唔識做啲乜,盡量唔好同佢哋提啲煩嘅嘢,講起嚟係我好煩、好麻煩、好輪盡,但我內心係唔舒服,我想做好啲做多啲改變多啲,但性格真係好難改,所以為咗令佢哋開心,我會做好自己多啲。」欣欣哽咽:「唔使做乜㗎,你只要喺度就得,你要健康就得啦,要食嘢要飲水。」

江媽媽已經77歲,最擔心自己百年歸老後,冇人照顧欣欣:「我真係時時都希望同祈禱,佢會有一個真正錫佢同好嘅人出現,求上帝安排,同埋健康、平安,做嘢順利,我可以做到嘅嘢都想為佢做。」欣欣笑問:「赴湯蹈火得唔得?擋子彈得唔得?」江媽媽就說:「好吖,如果子彈嚟嘅時候,我真係會企喺你前面。」

此時欣欣爆喊:「你已經畀咗條(生)命我啦,你嗰條(命)我唔要呀!食多啲嘢,早啲瞓,唔好擔心咁多嘢,唔好咁緊張,我好榮幸喺你健康時,有機會照顧你,你畀機會我好冇,健康多啲,開心啲!」江媽媽輕拍女兒:「你好乖,唔使成日擔心媽咪,我識照顧自己。」

 

 

(蘋果日報)

留言

發表迴響

你的電子郵件位址並不會被公開。 必要欄位標記為 *

Close